小食部的糖果零食

仲記唔記得細個小學個陣一放小息即刻拎住幾蚊衝到去小食部度買咩零食?(以前最多都係廿厘蚊,邊度好似肥仔以家個銀包入面有五百蚊大紙咁富貴呀?!)其實我細個時都唔會成日去小食部買野食,因為我係自己帶野返去食嘛。不過有時都會同同學仔買一兩次應酬下既。講起上黎都已經好耐既事lu,今日同媽媽係元朗行一間零食批發店,見到好多以前細個成日食既糖,好令人懷念啊。

小時候常食既糖果有:
爆炸糖

最中意就係食爆炸糖,貪佢係個口入面霹靂bala咁爆既感覺,好得意。

可樂罐糖同橡皮糖

可樂罐糖有另外一隻提子味,不過我都係中意食可樂味多d。橡皮糖就一定係相入面呢隻(因為平嘛),以前會特登揀多d黑色先買,今次都係,揀左有三粒黑色既,其他得兩粒jar。

飯碗糖同可以自己"jit"既朱古力漿甜筒

其實飯碗入面只係好普通既糖粉,好呃錢。不過個時真係會用個隻咁細既匙"更""不"黎食,諗起都覺得白痴。至於個隻朱古力漿甜筒,其實唔好食,只不過貪過癮先買黎食。

陳皮柑桔無花果等酸既野

有時候我都會買呢d酸既野食,好似呢盒無花果咁。仲有好記得一種我地叫佢做「鼻屎」既野,真名真係唔知叫乜,係一粒粒好細黑色既野,用一個圓筒膠樽入住,我成日都買黎食架。仲有,好似逢親呢d酸野都會有一個男人頭係包裝盒或袋上面,好奇怪。

唇膏糖同戒指糖

呢樣野真係經典。我通常都係食唇膏糖多,拎住支糖黎"chun","chunchun"下真係會當唇膏咁搽個咀然後"lam"返,一個小息食唔晒會收埋用個蓋蓋住下個小息再食...仲會食到成手痴笠笠....諗起都覺得核突兼唔衛生。而家都仲有得賣呀,不過又有一d新款既叫怪咀糖,點樣怪法?聽日搵真人示範比你睇。

其實仲有好多野架,我記得仲有一隻一條好長既糖,用紙包住既,好硬,但又好痴牙既,有士多啤梨味同提子味。仲有賣五毫子包既紫菜、魚肉香腸、一d都唔好食既尤魚絲等等。我既小學年代已經係九年以前既事lu,唔知而家小學小食部係賣d咩呢?如果都係賣呢d咁咪一d都冇進步過?