一周年。(有好多相,請耐心等候)

因為我唔知道阿金真正既出生日期,所以上年我地定左,佢黎個日,即係2月27日係阿金既生日。話咁快已經一年喇。肥金豬都兩歲了,希望你越來越乖,越來越聽教,仲有唔好再肥落去喇。我地全家都鍚晒你>3<~
今日生日,有大餐食。開左罐雞湯罐頭(佢至中意),又有菜,又有魚,又有糧。放肆一日咁多啦!

等食中....

食得未呀?

睇下金哥食得幾滋味~

最後個兜清晒~幾乾淨~


比個一年回顧你地睇。

初黎步到。

最中意扮乳豬全體。

都有英既時候既。

煙牛骨好食呀。

變左白皮豬,好搞笑。


"大"龜與"小"狗。


睇佢訓得幾失禮。

有時又匿埋訓。

有時又用蟲蟲當枕頭訓。

前排好凍成日都跳上梳化訓。

媽媽整左頂帽落佢件披肩度,即時變左"小黃帽"。

睇下佢個大屎忽,唔好再肥喇,去睇醫生實比醫生鬧喇。



金豬,永遠都愛死你!!!

歡樂嘉年華

新年假期咻一聲就過左。我好似咩都冇做過咁。
最後個日狂歡三寶去左嘉年華。學jill話齋,生活枯燥,玩下機動遊戲叫下調劑生活都好。
我,終於都沖破左個心理關口,夠膽玩機動遊戲了。
等個時好驚,但上到去就唔驚了。
原來唔死得架喎,仲幾好玩添。
但始終都唔敢玩跳樓機,個G-Force就更加唔好預我。
比我一步一步去克服佢好。
不過竟然玩左兩次大風車。
真係多人到嘔,等兩個鐘,玩一分鐘,如果玩跳樓機仲蝕,三十秒。
其實係幾傻仔,不過狂歡三寶圍威喂幾開心丫。
下次去海洋公園,我仲未睇過水母館呀。越礦飛車都未玩過呀。

仲有,究竟幾時先可以去到迪士尼呀?

好啦好啦,我認我係痴線喇。

當我中意一樣野或者一個人既時候真係可以好痴線。
呢期痴線就係因為呢個須賀英一郎。
就係我前幾篇話好想睇返既LOVE REVOLUTION入面藤木直人做既須賀英一郎。
係呀我終於搵到呢套DVD。
年初三睇到朝早五點終於睇晒。睇完個結局心情久久都不能平伏。
太好睇了。世界上有一個咁完美既人就好了。
之前仲睇晒西洋古董果子店。
剛剛開始睇SLOW DANCE。
仲有套給深愛的你等緊。
搵到套新高校老師就好喇。
係啊全部都有藤木直人,我都話我痴左線啦。

拿,一追開劇集就真係死得。
睇開有條癮,勁想搵返d舊日劇黎睇。
好唔心熄咁去搵over time,前幾日又比我搵到喎。
即係話,追完以上0個堆日劇之後又多一套喇。
呢云真係死得啦乜都唔使做喇。

(題外話 : 我中學年代睇既日劇大部份都係鳳凰衛視播,LOVE REVOLUTION, OVER TIME, WITH LOVE, EVE, 輕輕緊握你的手,仲有一套小報,全部都好好睇,不得不讚以前既鳳凰衛視真係識買劇,衰在係國語配音)

你地好奇怪點解我會咁得閒煲劇?
因為我過年冇野做囉。年初一年初二都冇頂去,年初三都只係夜晚食飯團拜。
你話唔煲劇煲戲仲有乜做?!

須賀英一郎 :love:

小野裕介

芹沢英介

呀....唔記得講....我終於到真人版既明智警視喇.......佢就係須賀英一郎!!!

(比我繼續痴線落去吧。)

豬年願望。

希望家人平平安安,
一團和氣。

衰運快d走,
好運快d黎。

Madonna - Confessions Tour

真係勁正。
視覺效果一流。
個d鞍馬呀鋼架呀睇到我嘩嘩聲。
佢將d手手腳腳扭來扭去真係勁好睇。
仲有我諗只有佢先夠膽著d緊身衫同高叉泳衣上台,仲要著得咁型。
歌唔使講啦,正。
唔怪得d人要特登飛去日本睇。
我有錢我都會咁做。
總之就冇得頂。


煲完麥當娜,跟住到何韻詩。

明明係冬天

但溫度有成二十幾度。
最過份既係冬天竟然係著短袖,
咁d長袖衫點算?
咁d大褸點算?
咁d靴點算?
最重要係,我仲點著我件新衫?

就連對氣候有三十年研究既陳強尼都話,
夏天可能會四十度….

前排無意中睇左套絕命真相(The inconvenient truth),
原來係戈爾講global warming既演講紀錄片。
但一d都唔悶,仲學到好多野。
好多人都覺得, global warming係theoretical既野,
但話你知,0係南極已經有一個冰架層0係短短一個月內完全融塌左。
連科學家對呢個速度之快都嘖嘖稱奇。
佢仲講左個故事,話一隻北極熊游左六十哩先搵到一塊浮冰,
當佢想爬上去抖下既時候塊冰因為太薄而裂開左。
最後呢隻北極熊因為搵唔到可以棲身既浮冰而浸死。

明日之後入面既災難可能真係誇張左好多,
但如果我地再咁樣破壞個地球落去,
若干年後冰河時期到來既速度一定會加速。

二十四度既冬天係一個警告,唔想香港既夏天四十度的話,
就請支持環保吧。

愛情革命

突然好想睇返籐木直人同江角真紀子套LOVE REVOLUTION。
因為呢套野所以中意籐木:love: 。
好想睇返咀角會發閃光既籐木( >3< )。


大家如果見到邊度有得買vcd或者d/l講聲比我知丫~搵得好辛苦呀!!!!

其實有好幾套舊日劇都想睇返,例如overtime(都係江角的)同with love。
老實講我真係幾中意睇江角真紀子。
以前常盤貴子都中意睇架。
不過而家都好少見到佢地lu。
(江角新個套唔知咩律師我都仲未睇。)
當然唔少得不婚男阿部寬啦。

始終,我都係最中意睇日劇。


最近我都諗點解我會突然堅持要學好韓文。
點解唔係日文呢?
可能睇東張西望見到阿宋芝齡用韓文訪問阿rain好型卦。
可能我中意睇韓片卦(唔係韓劇)。
(其實有時d韓片老土得黎會突然間有d位可以好感動我,係呀我幾老土架。)
可能我想睇得明d韓國護膚品同化妝品上面d"時文"卦。
其實我諗最大原因應該係我要懶型囉。
人人學日文我偏要學韓文。
係囉,就係咁簡單。
但希望我可以堅持落去。

你地做証,如果我畢業我唔繼續學落去就鬧爆我啦。

言歸正傳,記得見到邊度有LOVE REVOLUTION單聲比我知呀。

講故仔。

從前，
有一個好好味牌果汁o者喱，
包裝上寫住「警告：不可食用!」，
最後，王子同公主就過住好幸福既生活啦。


王子吻了公主，
王子變了冬菇，
公主變了雲腿，
他們從此係煲仔入面，
過住好焗既生活。



多謝收睇。